الأسرار الـ 6 .. ؟؟!!

ساعات بنحب نتكلم عن نفسنا .. و نقول اللي جوّانا ...
بس يمكن مـ أتعودناش نتكلم ... !!
و ساعات بـ نتمنى أي حد يسألنا عن نفسنا .. و يعرف أحوالنا ...
و نلاقي الكلام صعب أوي إنه يطلع ... !!
و ساعات بنشتاق لنفسنا أوي .. و نشتاق نقرّبلها أوي ...
بس يمكن نفسنا بـ تهرّب .. و تخاف إنها تقرّب لـ نفسها ... !!
ساعات كتير غريبه و محتاجه مليون تفسير ... !!

أنا دايماً بـ احس إن الإنسان متناقض أوي ...
و ساعات أحس إن يمكن أكون أنا بس ... !!
مش عارفه الكلام ده ايه لازمته ...
بس هو طلع كده .. أقولّه لأ يعني ... ؟؟!!

ناعومى حبيبتي ...
شكر خاص جداً جداً جداً ع الواجب اللي دبستيني فيه ...
و فيه حاجه عايزه أقولهالك قبل مـ أبدأ أجاوب ...
ساعات كتير بـ احس إني مقصرّه معاكي أوي ...
و ساعات كتير بـ احس إني مفتقداكي أوي ...
و ساعات كتير بـ ابقى عارفه إني مهييسه أوي ... !!
( زي دلوقتي كده بالظبط )
مش عارفه ساعات معلقه معايا أوي كده ليه ... ؟؟!!
مع إني والله مـ كنتش بسمع اغنية ساعات ... !! D:

المهم أفرجكوا على سؤال الواجب اللي هـ ارغي فيه كتير أوي ... !!
س : أذكر 6 أسرار قد لا يكتشفها من يقابلك أول مرة.
و دي قوانين الواجب اللي هـ ارغي فيه كتير أوي برضو ... !!

1. أذكر اسم من طلب منك حل هذا الواجب.

2. أذكر القوانين المتعلقة بهذا الواجب.

3. تحدث عن ستة أسرار قد لا يكتشفها من يقابلك للمرة الأولى.

4. حول هذا الواجب إلى ستة مدونين،وأذكر أسماءهم مع روابط مدوناتهم في موضوعك.

5. اترك تعليق في مدونة من حولت الواجب عليهم، ليعلموا عن هذا الواجب.

المفروض بقى إني أجاوب يعني ... ؟؟!!
مع إني عارفه إني مش هـ اعرف أجاوب كويس ... !!
بس أهو ... هـ احاول ...
مبدئياً كده أنا حاسه إن 6 أسرار دول كتير شويه ... !!
بس متهيألي بيجي أوقات بـ احس إنهم قليلين خالص ... !!
( عادي يعني .. مفيش إعتراض طبعاً )

المهم .. نبدأ على بركة الله ...
1. عصبـيـــه :
دي حاجه للأسف ملاحظه إنها بتزيد كل يوم عن اللي قبله ... !!
يمكن اللي يشوفوني يحسّوا إني بارده .. و أحياناً كمان بارده جداً ...
بس للأسف جوّايا بيبقى العكس تماماً ... !!
و أحياناً بكون بـ اغلى .. مش أكتر يعني ... !!
( يعني عصبيه من جوّايا دايماً .. و من برّه أحياناً )
و دي حاجه بجد بكرهها فعلاً .. و بتعصبني أكتر ... !!
لإني بـ أحرق دمي فـ الآخر .. ولا حد حاسس أصلاً ... !!

2. بـــحـــب :
هههههههههههههههههههه
مـ حدش مخه يوديه لـ بعيد ... !!
آه بحب بجد .. و للأسف غالباً بحب أغلب الناس ... !!
ممكن أحب ناس لمجرد إني اتكلمت معاها ثواني ... !!
ممكن أحب ناس مـ اعرفتش عنهم غير اساميهم ... !!
ممكن أحب ناس عشان ابتسامتهم جات مرّه فـ وشي ... !!
( للأسف بحب أغلب الناس بسهوله جداً .. و صعب إني أكرّه حد )
و دي حاجه برضو مش بحبها ...
لإني فـ الآخر بـ اتصدم كتير .. و بـ آخد على دماغي كتير أوي ... !!

3. مـش إجــتماعيه :
مـ أعرفش إزاي ... !!
الشائع غالباً .. إني إجتماعيه .. و الكلام ده صح إلى حد كبير ...
أحياناً بحب أشارك فـ حوار شدّني .. أو ليّا رأي فيه ...
و أحياناً كتير بـ ابقى نفسي اتكلم .. بس فيه حاجه بـ توقفني ... !!
و الكلام كله فجأه يضيع .. و يقف ... !!
معرفش إزاي برضو ... !!
( هههههههه .. حالتي صعبه أوي أنا عارفه )
يعني ممكن أقول إني بـ احاول أبقى إجتماعيه ...
بس أحياناً الظروف مش بتساعدني و الناس مش بتساعدني ...
و قبل ده كله .. نفسي مش بتساعدني ... !!

4. شـــقيــــه :
ههههههههههههههههههه
دي بجد يمكن مـ كنتش حاساها أوي ...
و لفت نظري ليها - من اسبوع يمكن - واحد صاحب بابا ... !!
قاعدين كلنا العيلتين مع بعض .. و بـ نتكلم عادي ...
و فجأه لاقيته بيقول .. انتِ شقيه على فكره ... !! D:
مع إني كنت عادي يعني فـ حالي ... !! D:
فـ الحقيقه أغلب الناس عارفه إني هاديه ... !!
بس متهيألي كلنا مهما كان عمرنا .. بـ نكون أشقيه و جوّانا لسه أطفال ... !!
عشان كده بجد نفسي ...
كل الناس تطلع براءة الأطفال اللي جواها .. بس من غير عقولها ... !!
( رغم إني كتير بـ احس إن البراءه دي جمله مـ لهاش أي معنى اليومين دول )

5. بـ أنسى بسرعه :
يمكن لما بزعل من حد .. بزعل فعلاً جامد ...
بالذات لما يكون حد عزيز عليّا أوي ...
و دي بـ تبقى مشكله فعلاً ...
اللي قدامي حاسس إني مدايقه .. و خلاص قفلت على كده ...
و مش هـ اعدي أي حاجه بسهوله ...
و بيخاف يقرّب يتكلم معايا .. لإني صديته مرّه مثلاً ... !!
بس للأسف الكلام ده مش صح 100 % ...
أنا أكتر واحده سهل يضحك عليها يعني بلا فخر ... !! D:
ممكن كلمتين حلوين و معاتبه أو توضيح ...
و كله بجد بيروح فـ ثواني .. و بـ اصفى على طول ... :(
أحياناً بـ ابقى عايزه أعمل العكس .. و اتقمص شويه و أغلس ...
بس غالباً للأسف دي حاجه بتحصل بـ تلقائيه أوي ... !!
لكنها فـ الآخر .. بـ تقف ع الكلمتين ... !!
يعني ممكن الكلمتين لو مـ اتقالوش .. فعلاً بـ أبقى وحشه ... !!

6. بــحــب مصـــر :
مش عارفه .. كل لما أفكّر فـ الموضوع ده و أقول الكلام ده ...
بـ احس أحياناً إني بضحك على نفسي ... !!
بس بجد غالباً بـ ارجع أقول أنا بحب مصـر .. و بـ اقولها من قلبي ...
يمكن الظاهر إني مش عاجبني حاجه .. و كارهه مصـر ... !!
أنا فعلاً كارهه .. بس كارهه تصرفات ناس فـ مصـر ... !!
كارهه اللي مصـر وصلت ليه .. كارهه كل اللي بيحصل ... !!
إنما مصــر ..... بحبها أوي ...
يمكن أكتر مره حسيت بيها إني بحب مصـر .. و كانت تقريباً أول مره ...
لما سافرت بعيد عن مصـر من أكتر من سنة ...
حسيّت بـ قيمتها بجد ... !!
لما شفت إزاي مصـر حلوه أوي .. و ناسها حلوين مهما عملوا ...
لما كنت قاعده فـ عاصمه .. بدون ذكر أسم العاصمه يعني ...
و النور يقطع يومياً - تقريباً - بليل ... و فـ عز الإمتحانات ... !!
لما تحس انك غريب فـ بلد مش بتاعتك .. ناس شكلهم غريب أوي ...
لما أول مـ تسمع لهجه مصريّه عينك تجري بسرعه و تدوّر ع الصوت ...
حتى و لو هـ تكتفى إنك تسمعه من غير مـ تتعامل مع مصدر الصوت ... !!
لما أول مـ توصل مصـر بعد غربه مـ كملتّش شهر ...
و تشوف مــصـــــر ...
و تقول - بتلقائيه - من قلبك ...
يااااااااااه مصـــــــــر أم الدنيا فعلاً ... !!
( ربنا يصلح حال مصر .. و يرجعها و يرجع ناسها زي زمان )
جاهين كان قايل حاجه حلوه أوي ...
يمكن حطيتها متأخر شويه فـ المدونه .. بس إحساسها فعلاً عالي أوي ...
كان بيقول ايه عم جاهين بقى ... ؟؟!!

على اسم مصر .. التاريخ يقدر يقول ما شـــاء
أنا مـصــر عندي أحب .. و أجـــمل الأشــــــياء
بـ احبها و هي مالكه الأرض .. شرق و غــــرب
و بـ احبها و هي مـرميــّـــه .. جريحـــة حـــرب
بـ احبها بـ عنف و بـ رقه .. و على اسـتحـيــاء

متهيألي كفايه كده أوي عليكوا ...
سبحان الله كنت حاسه إني مش هـ لاقي كلام ... !!
بس الحمد لله .. و للأسف فـ نفس الوقت ... !!
لقيت كلام و رغي كتير أوي .. استحملوني بقى عادي ... !! D:

آآآآآآآآآآآآآآه شروط الواجب قبل مـ أنسى ...
1. طبعاً واضح إن اللي طلبت مني الواجب الجميلة ناعومى ...
2. ذكرت القوانين فوق .. هي حكايه بقى ... !!
3. تحدثت عن الـ 6 أشياء و رغيت كتير أوي ... !!
4. تحويل الواجب بقى .. دي مشكله فعلاً ... !!
لسه مش عارفه مدونات كتير أوي زي أغلب المدونين ...
و كل لما أروح مكان أعرفه الاقي الواجب موجود و محلول ... !!
بس عموماً يعني اللي قدرت أعرف أحولّهم الواجب كما يلي ...
ا. إيهاب رضوان .
ا. تــــامر .
الجميلة مروه يـــس ( كريزمانيا ) .
إسماعيل البلتاجي ( كرموز ) .
و يا خوفي لـ حد يكون حوّلهم الواجب قبل كده ... !! :(
و الواجب اللي هـ يتحوّل تاني بقى لــــ
نورانه القمر .
( للمره التانيه .. ينفع صح )
د. محمد الدسوقي .
( للمره التالته .. عادي جداً )
5. التعليق هـ اسيبه إن شاء الله فـ كل مدونة ...
و الناس تحاول تساعد معايا عشان مش هـ اعرف أوصل لكله ...
شكراً لحسن إستماعكم .. و إستحمالكم ...
و نستودعكم الله الذي لا تضيع ودائعه ...

مصر في تقدّم مستمر .. !!

لا والله عاااااال ... !!
البلد في تقدم مستمر ... !!
و الحرية كمان في تقدم مستمر ... !!
و إحنا في تقدم مستمر برضو .. غصب عنّا ... !!
يلا الواحد يلحق يكتب أي حاجه قبل مـ الطبخه تتنفذ ...
مش يمكن بكره يكون مسيري زي إسراء عبد الفتاح مثلاً ... !!
ولا زي ناس كتير- منعرفهمش - قالوا كلمة تدايق حكومتنا البهيـّه ... !!
هههههههههههههههه
آه معلش نسيت أقول أنا بتكلم عن إيه الأول ... !!
معلش أصلي عايزه ألحق أقول اللي فـ نفسي قبل مـ أتمنع من إني أقوله ... !!
,, تنظيم البث المسموع والمرئى ...
والرقابة على جميع وسائل البث بما فيها الإنترنت ,,
و في قول آخر ...
,, قانون ذبح الفضائيات و الفيس بوك ,,
لسه الخبر طالع طازه ... و لسه فيه حاجات يمكن مش عارفينها ...
بس صراحه يعني البداية باينّه من أولها ...
- موفقه طبعاً - هو حد يقدر يتكلم ... ؟؟!!
ههههههههههههههههههه
- معلش مـ هو الواحد لازم ياخد باله من كلامه برضو ... !! -
صراحه مش عارفه كتير ع الموضوع ...
و مش فاهمه ايه الهدف الأساسي بالظبظ ... !!
شوفوا معايا كده ايه الهدف الأساسي - المقنع - ده ... !!
الحد من إنتاج برامج يتم بثها مباشرة للجمهور بمحتوي يهدد النظام العام
والآداب وما ينطوي علي ذلك من إخلال بأمن وسلامة البلاد !!
مش عارفه بجد سؤال جاي على بالي قوي ...
هو إحنا شعبنا عبيط - آسفه يعني للفظ - للدرجه دي ... ؟؟!!
يلا مش يمكن بكره يرفعوا مرتبات شلن و لا بريزه ... !!
و لا يمكن يرجعولنا المواصلات بربع جنيه ...
بدل البريزه اللي بيتخانق عليها الناس دي ... !!
أهو أكيد هـ يلهونا بأي حاجه عشان ننسى و نسكت كالعاده ... !!
لأ يلهونا ليه أصلاً ... ؟؟!!
مـ احنا ملهيين خلقه ... !!
و كمان بعد مـ القانون ينزل إن شاء الله و عليكوا خير ...
يبقى طبعاً طبعاً طبعاً ... لازم نسكت أكتر مـ إحنا ساكتين ... !!
أيوه طبعاً ... إحنا ناس بتخاف على مصلحتها و ماشيه بمبدأ :
ابعد عن الشر .. و غنّيله ... !!
اللي فهمته يعني إن الحمد لله الموضوع هيبقى مقتصر على ...
قنوات التليفزيون .. شبكات النت .. شبكات المحمول ... !!
- و ما خفي كان أعظم -
بــــــــــــــــس .. ياااااااااااادوب يعني ... !!
بسيطه مش كده ... ؟؟!! مقدور عليهم صح ... ؟؟!!
ههههههههههههههه
كانوا جايبين أسامة سرايا ( رئيس تحرير جريدة الأهرام ) فـ قناة الجزيرة ...
المذيعه كل مـ تسألوا ... يتوّه فـ الإجابة خالص ... !!
تسألوا سؤال تاني ... يرغي فـ أي حاجه مالهاش لازمه ... !!
المذيعه بعد مـ خلصت كلام عشان تقفل الحلقة نسيت نفسها و ضحكت ... !!
ده بيدل على ايه بقى ... ؟؟!!
طبعاً يعني بيدل إن كلامه حلو و مـ حدش يقدر يقول غير كده ... !!
- آه أصل أنا بقيت أخاف على نفسي بقى معلش -
لأ تعالوا نتفرج ع العقوبات .. شوفوا بجد الرفق بالحيوان ...
إحم ... قصدي يعني الإنسان ... !!
وفي الجزء الخاص بالعقوبات نص مشروع القانون علي أن :
يعاقب بالحبس وبغرامة لا تقل عن عشرة آلاف جنيه ولا تتجاوز خمسين ألف جنيه أو إحدي هاتين العقوبتين
كل من تعدي علي أي حق من الحقوق المقررة للجهاز.كما يعاقب بالحبس مدة لا تقل عن شهرين ولا تتجاوز سنتين
وبغرامة لا تقل عن خمسين ألف جنيه أو بإحدي هاتين العقوبتين كل من قام بتوصيل برامج مسموعة أو مرئية إلي الغير
دون ترخيص مسبق من الجهاز.
ويعاقب بالحبس مدة لا تقل عن شهر كل من أفصح أو أدلي ببيانات أو معلومات لا يجوز الإفصاح عنها أو الإدلاء بها متي تعلقت بنشاط الجهاز.
دول بيتكلموا فـ ألوفات ... !!
طب بالذمه يعني ألوفات ايه دلوقتي ... ؟؟!!
إحنا ناس غنيه و بنتعامل بـ المليارات ... !!
ده لو مـ كنّاش بنتعامل بعمله صعبه مثلاً ... !!
طيب بالله عليكم بصوا كده هنا بصّه ع المادة التانيه ...
يلتزم مقدمو خدمات البث المسموع والمرئي بمراعاة القواعد الآتية:
١- علانية وشفافية المعلومات وحماية حق الجمهور في الحصول علي المعلومة السليمة.
٢- حماية المنافسة الحرة بين المتنافسين في مجال خدمات البث المسموع والمرئي.
٣- حماية حقوق ومصالح متلقي خدمات البث المسموع والمرئي.
٤- توفير الخدمة الشاملة للجمهور بما يتفق مع التطور الديمقراطي، وضمان إتاحة البرامج الثقافية والتعليمية.
٥- عدم التأثير سلباً علي السلام الاجتماعي والوحدة الوطنية ومبدأ المواطنة والنظام العام والآداب العامة.
٦- التقيد بضوابط وأكواد الخدمة التي تصدر وفقاً لأحكام هذا القانون، وكذلك ميثاق العمل الإعلامي العربي، وكذلك وثيقة الضوابط العامة للبث الفضائي العربي المسموع والمرئي.
٧- الارتقاء بمستوي الرسالة الإعلامية وتقديم خدمة متميزة تلبي الحقوق والاحتياجات من العملية الإعلامية.
لا بصراحه يعني .. بجد .. عدّاهم العيب ... !!
هههههههههههه
شوفوا سبحان الله .. عيني جات على تعليق حلو قوي بصراحه ...
كاتبه حسام المصري .. فـ موقع المصري اليوم .. بعنوان بلاش وجع قلب ...
أنا شايف ان الاصلح للحكومه ان تصدر قرار بان
كل مولود يجب ان تقفأ عينه و يقطع لسانه ويتم خرم طبلة ودنه
و ممنوع دخول المدارس و لا المستشفيات والاحسن ان يقوم الاهالى
برمى العيال فى الشارع الا اولاد الاكابر و تخيل بعد ذلك السعادة والرخاء
وارتفاع مستوى المعيشة للشعب و الدولار حيبقى بقرش....
يا سلام ....يا سلام... ..يا سلام ...
يالا وافقوا على القانون بقى بلاش وجع قلب ناس ما بتفهمش بصحيح
تعليق كمان عاجبني ...
كاتبه محمد .. فـ موقع المصري اليوم .. بعنوان والله عيب عليكم ...
ان لم تستحي ...فافعل ما شئت احنا بنمشي لقدام ولا لوره
يعني بكرة نلافي قناة الجزيرة اتقفلت و الفيس بوك اتقفل
لا و ممكن كمان تقفلو الرسايل بتاعت الموبيل اللي ضد النظام
لا و تسيبولنا قنوات الهلس و المسخرة الكليبات و الافلام
خلي الشعب نايم يعني هي فارقة ...
و سلملي علي الحرية
ههههههههههههههههههه
ده كمان .. أما نشوف مصير المدونات هيبقى ايه ... ؟؟!!
كاتبه مدمن نت .. فـ موقع المصري اليوم .. بعنوان سؤال لو سمحتم ...
معني كده ان الواحد علشان يعمل مدونه لازم ياخد ترخيص اولا
وكمان علشان يكتب تعليق لازم ياخد ترخيص اولا
انا حلغي النت واخد ترخيص علشان اروح انام
والله معاهم حق ... كل يوم مصر في تقدم مستمر ... !!
ربنا يحميها و يحفظها يارب ... !!
دول بعض التعليقات اللي عيني جات عليهم ...
طبعاً مـ قريتش بالترتيب ولا أي حاجه ...
دول صدفه بس .. و يا محاسن الصدف ... !!

الموضوع بقى مستفز قوي الصراحه ...
بس بجد يعني .. إحنا لازم نشكرهم عشان خايفين علينا ...
لازم نشكرهم عشان حريتنا تبقى حرية تمام و صح ...
لازم نشكرهم على المستوى اللي مصر وصلت ليه ...
ياااااااااااااه .. ده إحنا عايزين نشكرهم على حاجات كتير قوي ... !!

مش عارفه .. كان فيه كلام واقعي جداً بـ يتقال لما حد يعترض ...
فيما معناه يعني اللي يتفهم .. رغم انه مفهوم أصلاً ... !!
اللي إحنا فيه ده إبتلاء من ربنا ...
و إحنا برضو نستاهله أكيد ...
لإن ببساطه علاقتنا بربنا - غالباً - مـ بتكونش صح ولا كويسه ... !!
(( إذا عصاني من يعرفني .. سلطت عليه من لا يعرفني ))

دي بقى حبة مقتطفات سريعه كده لاقيتها و أنا بدوّر ...

قال صلى الله عليه وسلم :
(( إذا تبايعتم بالعينة وأخذتم أذناب البقر ورضيتم بالزرع وتركتم الجهاد
سلط الله عليك ذلا لا ينزعه حتى ترجعا إلى دينكم ))

سأل أحدهم شيخه قائلا:
قل بربك عن أسباب محنتنا *** فربما وجدنا الماضى أعدناه.
فأطرق الشيخ حينا ثم عاوده *** حنينه فارتوى بالدمع لحياه.
وقال مقولة حق لا نظير لها *** الله ضيعنا لما أضعناه.

يا أُمة الحق إن الجُــــرحَ متسـع ٌ *** فهـل تــــُرى من نزيف الجرح نعتبرُ
ماذا سوى عــــودةٌ لله صادقــــةٌ ***عسى ُتغيـــر هــذي الحال والصــورُ

اللهم لا تسلط علينا بذنوبنا من لا يخافك فينا ولا يرحمنا
آخر كلام أحب أنهي بيه ...
قال تعالى (( إن الله لا يغير ما بقوم حتى يغيروا ما بأنفسهم ))

ملحوظه : لمزيد من المعلومات عن هذا القرار ...
إضغط هنا ... موقع المصري اليوم ...
واحده كمان : جروب ع الفيس بوك لمعارضة القرار ...
من هنااااااااااا
آخر ملاحظه بقى : إدعولي بقى إن ربنا يسترها معايا ...
حاسه إني لخبطت خالص .. ربنا يستر ... !!

رُبما بعض من الفضفضات .. !!

لا أعرف لماذا أكتب ...
و لا أعرف ماذا سأكتب ...
ليس لدّي ما أقول سوى ...
... الحمد لله ...
أقولها من قلبي لأني - بصدق - توقعت الأسوأ من ذلك ... !!
أتمنى أن أتعلم من أخطائي .. لا أحب تكرار الخطأ ذاته .. و الندم ذاته ...
أتمنى أن يعينني الله على القادم ...
و أتمنى - فقط - أن أثبت ذاتي ...
فـأنا أعرف قدراتي .. و أعرف أن هذا ليس كل ما لدّي ... !!*****
هـَـــــــــــــمـَـــــــــــــــــســـــــــــــــــــــــــات
أبي .......
فعلت كل ما بوسعك لأجلي .. لولاك ما كان هذا مستقبلي إطلاقاً ...
خذلتك قليلاً - أعرف - لكنك لم تمّل و لم تكتفي ...
ساعدتني أيضاً بعد خذلاني إياك ... !!
خذلتك مره أخرى - أعرف - لكنك مازلت على أتم إستعداد لمساعدتي أكثر ... !!
أبي .......
بصدق أخجل من نفسي .. لا أعرف ماذا أقول لك .. و كيف أشكرك ...
لكني أدعوا الله ألا أخذلك مره أخرى ...
أتمنى ذلك بصدق .. لأجلك و لأجل أمي .. لأجلكم أكثر مني ...أبي .......
حفظكَ الله و رعاكَ و أعطاكَ طيلة العمر ...
فليعينك الله علـّي و علينا جميعاً ...
فأنت بصدق تعاني الكثير لأجلنا ...
أمي .......
لن أنسى وقفتك بجانبي طيلة الوقت ...
لن أنسى سفرك معي إطلاقاً ...
لن أنسى تعبك معي و شقاءك ...
أعرف أن تلك الكلمات تأخرت كثيراً ...
و أعرف أن مضى عليها أكثر من عام لأقولها ... !!
لكني بصدق قلتها من قبل .. بداخلي ... !!أمي .......
وقفتِ بجانبي أيضاً بعد خذلاني إياكِ .. ساعدتني كثيراً ...
أعطيتني الكثير من الكلمات كي أثق بنفسي .. كي أفعل كل ما بوسعي ...
و كي أترك الكثير من الأفكار الحمقاء التى دارت بذهني عند إحباطي ... !!
أعرف انها حمقاء .. و أعرف لماذا عارضتني فيها ...
لأن كلانا يعرف أن هذا ليس كل ما لدّي ... !!أمي .......
عانيتِ من أجلي .. و من أخوتي كثيراً ...
أعانك الله علـّي .. علينا جميعاً ...
فليحفظك الله .. و ليعطيكي طيلة العمر ...
أبي ....... أمي .......أحبكم بصدق ...
و أحمد الله كثيراً لوجودكم في حياتي .. فأنتم لستم كالجميع ... !!
أقولها بصدق .. من قلبي ...
أستطيع الإستمرار .. أستطيع بصدق ...
أتمنى أن أثبت ذلك .. و أن يبتعد عنـّي كل ما يثبط أملي و ثقتي ... !!
*****
أخاف أن تكون تلك الكلمات .. ككل الكلمات ...
كلمات في لحظة ندم ... و أمل ... و بعد ذلك ... تتلاشى ... !!
أتمنى ألا تتلاشى .. و أنا الوحيده القادره على ذلك ... !!
قف بجانبي و ساعدني يا الله ...