2008/08/29

ساعات .. ساعات .. !!


عالم فاضيه .. و ناس مجانين
زوّدوا ساعة .. نقصّوا ساعة
كل كلامهم .. سمعاً و طاعه
حاجه تفلق .. حاجه تجنن
عالم فاضيه .. مخـّها رايق
إمتى نقدّم .. إمتى نأخـّر ؟؟!!
بصوا قولولنا ...
إمتى هـ نفطـّر ؟؟!!

بكره كمان .. لسّاه جاي
بكره يقولوا هل هلاله .. صوموا من بكره
و كل البشر .. هـ تصوم بعده ... !!

و أما نشوف .. عالم صايمه وقت العيد ... !!
ايه هـ نقول .. لـ دي عقول ؟؟!!
عالم فاضيّه .. عالم رايقه
و إحنا وراهم زي الغول ... !!
سمعاً و طاعه .. زي العاده ... !!

[Fasla.gif]
معلش يا جماعه .. مـ حدّش ياخد فـ باله ... !!
على رأي مش عارف مين .. تهييس آخر الليل ... !!
إلا صحيح .. هي مش حاجه تجنن برضو و لا أنا غلطانه ... ؟؟!!
حسبي الله و نعم الوكيل ... !!

2008/08/28

Only .. Need 2 Cry


أشتاقك ...... !!
أفتقدك ....... !!
أحتاجك ...... !!
و عندما تجيئين ...
لا تطاوعيني .. ولا تنفذين ما أرغبه ... !!
فـ تبعتعدين سريعاً .. و ترحلي ... !!
... دمـــــــوعـــــــي ...
سانديني قليلاً ... !!
ساعديني على الإستمرار ... !!
بالفعل ... لم أعد أحتمل ... !!

2008/08/27

جيـــــــ أخيرا ـــــــــت .. ؟؟!!

جيت أخيراً .. د. انا بستناك !!
مـ السنه للسنه .. بستناك !!
بستنى عطرك .. و عبيرك
بستنى لياليك .. الجميلة
بستناك .. ياللي كلك نور و صفاء
رحمة و مغفرة و وفاء
الشياطين فيك تتسلل
و الذنوب فيك تتقلل
و الحسنة فيك تتضاعف

ياسلام علي لياليك الجمية
مـ فهاش سب ولا شتيمه
كلها دُعاء .. و تقاء
رحمة و مغفرة .. بدون شقاء

ياسلام عليك يا رمضان
فيك يوم غير الأيام
اللي يدعي فيه ...
بـ كل صفاء و وفاء
ينال محبة الرحمن

تـ تمحي ذنوبك كلها
كأنك طفل بدون أخطاء
أكيد عرفتو الليلة دي
دي ليلية القدر يا بشوات
اللي تمحي كل السيئات

يارب ساعدنا على إحياءها
و على إحياءك يا رمضان

و ف نهاية كلامي بـ أقول
رب رمضان .. هو رب كل الشهور

[Fasla.gif]
بوست منزلاه عشان رمضان ...
و لو مـ كانش عن رمضان ...
مـ كنتش أعتقد أبداً إني هـ نزلـّه أصلاً ... !! D:
مش عايزه تحديف طوب .. و لا حتى طماطم ... !!
[Fasla.gif]
دي تقريباً كانت أول محاوله عامّي ليّا منفصله ...فيها تعديلات بسيطه قوي .. ومفيش تعديلات كويسه راضيه تيجي معايا ... !!
كانت بتاريخ 29/9/2006 ... !!
الوقت بيعدّي بسرعه قوي .. سبحان الله ... !!
كل سنة و انتوا طيبين و بصحة و سعادة و خير ...
يارب نعرف نستغل رمضان كويس السنه دي ... !!
بالمناسبه ...
فيه حاجه متواضعه كنت عاملاها رمضان اللي فات ...
ياريت تنزلوها .. و تحاولوا تمشوا عليها ...
أنا مـ مشيتش للأسف عليها كلها ... !!
بس ربنا يقدرني و أمشي عليها رمضان ده ...
المهم البتاعه دي تقدروا تنزلوها من هنا ...

RaMaDaN-3.gif picture by fosdo2

2008/08/26

الكتاب خير جليس .. !!


الكتـــــــــــــــــــــــــــــاب ...

عرفنا من و إحنا صغيرين جملة ...

الكتاب خير جليس ...

أخدنا كلام كتير عن الكتب .. و القرايه .. و أهميتهم ...

القرايه يمكن مش من الهوايات الأساسية بالنسبالي ...

رغم إني حابه القرايه .. بس للأسف مفتقداها قوي ...

خاصة ً قراية الكتب .. لإن النت غيّر حاجات كتير قوي فـ حياتنا ...

القرايه من كتاب .. تختلف كتير عن القرايه ع النت ...

مش عارفه بـ احس إن ليها طعم تاني بصراحه .. و بتفرق قوي ...

كل ده رغم إن قرايتي للكتب للأسف تكاد تكون منعدمه ... !!

مش هرغي كتير .. و مش هـ أتأخر أكتر من كده ...

[Fasla.gif]
الموضوع بما فيه ...

إن البشمهندسه الجميلة ريـــــــــم بعتالي واجب من كام يوم كده ...

فـ أنا جيت عشان أحلـّه أخيراً ... !!

مبدئياً كده مـ تتصدموش مـ الإجابات ... !!

و سامحوني بقى أصلي - كالعاده - مش مذاكره كويس ... !!

بس إن شاء الله ناويه أذاكر .. دعاوتكم ...

[Fasla.gif]

نشوف الأسئلة سريعاً كده بقى ...

ما اسم أول كتاب قرأته في حياتك بإستثناء القصص و الكتب الموجهة للأطفال؟

صراحه على مـ أفتكر انه كان الفئران المتوحشه ...

كان صرعة أو صرخة الرعب ... !!

من غير تريقه لو سمحتوا ... !! D:

[Fasla.gif]

حدثنا عن 3 كتب قرأتها و تمتعت بها .. و انصح الأخرين بقراءتها !!

زي مـ قلتلكم فوق ...

قرايتي للكتب مش كتيره قوي و للأسف تكاد تكون منعدمه ... !!

عشان كده مـ أقدرش أحدد كتب معينه ... !!

يمكن قرّيت لـ فاروق جويدة.. حبيبتي لا ترحلي ...

قريّت رباعيات صلاح جاهين .. تقديم يحيى حقى ...

كان تبع مهرجان القراءة للجميع سنة 96 ...

( واحده صاحبتي عرفت إني بحب جاهين جداً .. و لقيته عندهم فـ المكتبة )

الأبنودي .. بعد التحية و السلام ... بس مـ خلصتوش كلـّه ... !!

قريّت جزء من كنوز المعرفه .. لـ د.أيمن أبو الروس ...

( عجبني فيه معلومات كتير متنوعة و حلوة )

ده غير بقى حاجات الأطفال .. ميكي , ماجد , بلبل , العربي ... إلخ ... !! D:

و القرايات المتفرقه بقى .. حاجات مختلفه عن بعضها ...

الحاجات دي غير طبعاً قرايات النت .. لإن النت حاجه تانيه خالص ... !!

[Fasla.gif]

حدثنا عن كتاب قرأته و تمنينت انك لم تفعل ؟؟

مش عارفه .. مـ أعتقدش إن فيه كتب مش مفيده عموماً ...

بس أنا بتغاظ فـ القصص الخيالية قوي لما النهاية تبقى مستفزه ...

مع إن نهايتها أكيد لازم تبقى مستفزه ... !! D:

[Fasla.gif]

الكتاب الذي تقرأه حاليا في حالة وجوده ؟؟

بما إن الحاله النفسيه مش مساعده خالص ...

و إني مخاصمة الكتب غالباً ... !!

فـ مفيش - للأسف - حالياً حاجه بقراها ... !!

بس ناويه إن شاء الله أبدأ بـ أجاثا كريستي ...

عشان نفسي أقرالها لإني بسمع عنها كتير ...

ناويه كمان على حاجات دينية مبسطه ...

لإني بـ أحس إني مسلمة إسماً بس ... !!!

نفسي كمان قوي أقرا لـ ناس كتير معرفتي بيهم كانت ع النت ...

زي ناعومى , د.محمد الدسوقي , د.عمرو عز الدين , ا.محمد ابراهيم محروس ... إلخ

أي حد مـ الأسماء الكبيره اللي شوفتها ع النت ...

[Fasla.gif]

الواجب بقى المفروض إني أبعته لـ 6 ...

ا.إيهاب رضوان ( دخل الشتا ) ...

الجميلة نورانة ...

د.عمرو فاروق ( كلام من القلب) ...


هـ ابعته تاني لـ ...

الجميلة قوي د. ناعومى ...

د.محمد الدسوقي ...

د.أحمد ( وجه جديد ) ...

[Fasla.gif]

معلش الواجب مش مركزه فيه كويس ...

بس كان لازم أحله عشان مـ أتأخرش عن كده ...

شكر خاص جداً جداً لـ ريـــــم ...

و سامحيني بقى عشان حل الواجب مش مثالي ... !!