2009/01/29

خطوة تفاؤل ( 1 ) .. !!

بـ اعتذر عن التأخير اللي حصل ...
هـ نبدأ بـ أول خطوة إن شاء الله ...
و من رأيي إنها أول و أهم خطوه فـ كل الخطوات ...
***
!! ... الإقتناع ... !!
لازم أول حاجه نكون مقتنعين إننا عايزين نتفاءل ...
لإن مـ ينفعش نمشي فـ أي خطوه .. و جوّانا مش مقتنع ... !!
فيه ناس جوّاها مش مقتنع إنها عايزه تتغيّر ... !!
ناس عاجبها مود الإحباط و الاكتئاب ... !!
و ناس مش متخيله طعم التفاؤل من غير أقرب الناس ليهم ... !!
- و الواقع إن أقرب الناس ليهم مش معاهم .. لأي ظرف -
ناس مش قادره تاخد أي خطوة إيجابيه ...
- بسبب حاجه - أيَّاَ كانت - مأثرّه عليهم -
ناس .. و ناس ...
يعني أمثلة كتير قوي - للأسف - مـ تتعدِّش ... !!
و للأسف .. صعب إنها تتغير طالما مقتنعه بـ التفكير ده ... !!
***
كلنا أكيد عارفين ايه نقط ضعفنا ...
عشان كده لازم نحددهم .. و نقنع نفسنا اننا نـ قدر نتغلب عليهم ...
لازم نـ حاول و نقول لنفسنا لأ ... !!
كفايه .. لازم نـ تغيَّر ... !!
***
يـ ـتـ ـبـ ـع .. مع الخطوة التانيه بإذن الله ...
مستنيه تعليقاتكم .. كل واحد يجي يقولنا وصل لـ فين ... !!
مين قادر يقول لأ كفايه ... و مين مش قادر ... ؟؟!!
مين متفاءل ... و متفاءلي إني أتفاءل ... ؟؟!! :(
***
بعتذر تاني لإني فاقده جزء كبير من تركيزي ...
و حاسه إني عمّاله أرغي زياده عن اللزوم ... !!
و بعتذر لو كنتوا متوقعين إسلوب أحلى من كده و فكره أحلى ...
بعتذر عن كل حاجه ...
معلش سامحوني لو قصّرت معاكم ... :(

2009/01/28

إعتــــــذار .. !!


السلام عليكم و رحمة الله و بركاته
معلش يا جماعه آسفه مش هـ أقدر أنزل أول خطوة النهارده ...
هـ أخليها لـ بكره إن شاء الله ...
بعتذر مره تانيه ...
- دعواتكم -

2009/01/27

خطوة تفاؤل ( مقدمة ) .. !!

بصوا بقى ...
مـ الأول كده مـ حدش يحسد ... ماشي ... ؟؟!! D:
اللي عينيه صفرا و لا مدوّره - زي مـ بيقولوا - بلاش يجيبها معاه ... !! D:
بـ إختصار شديد ... شديد يعني ...
خيييييييييييييير اللهم إجعله خيييييييييييييير ... ؟؟!!
نويت أتفاءل ... !!!!! D:
- أسمع بقى حد معترض -
و كمان عايزاكوا تتفاءلوا معايا ... !! D:
- حد معترض -
الناس أغلبها مكتئب ... !!
و البلوجات بقى الطبيعي إنها مكتئبه ... !!
و كل الناس كارها عيشيتها ... !!
اللي بيحصل فـ فلسطين .. و المناظر اللي بنشوفها يومياً ... !!
و حال العرب .. اللي لا يسر عدو و لا حبيب ... !!
و اللي حب ناس كتير .. و إتصدم فيهم قوي ... !!
و اللي صاحب .. و صحابه باعوه ... !!
و اللي فقد أعز الناس .. و أقربهم ليه ... !!
و اللي الغربه مبهدلاه .. و خلاص جاب آخره ... !!
و اللي حب .. و حبيبه خانه ... !!
و اللي اتنيل .. و الموضوع كان لازم ينتهي ... !!
و اللي قرفان من دراسته .. و إمتحاناته الأموره ... !!
و اللي مـ تخانق مع نفسه .. و مش لاقيها ... !! D:
يييييييييييييييييييه .. ده كتير قوي يعني ... !!
هو أنا بـ أعد فـ إيه أصلاً ... ؟؟!! D:
هو في ايه ... ؟؟!!
لأ بقى .. سوري يعني .. كفايه كده ... !!
معلش المره دي الإسلوب over شويه ...
بس للأسف .. ده اللي حاصل مع الناس ... !!
و للأسف عارفين كده .. و قاعدين ... !!
مقوله جميلة قوي قريتها من ثواني ...
و أنا بعمل سيرش على صورة للأمل ...
كانت بـ تقول ...
لا تيـــــــــــــــــــــــــــــــأس ..
فالإبحار في بحر من الأمل .. خير من الوصول إلى شاطئ اليأس ... !!
هـ نبدأ أولى خطوات التفاؤل من بكره إن شاء الله ...
- و الخطوات الباقيه لسه مش عارفاها .. بس هـ تيجي إن شاء الله !! -
كل اللي ناوي يتفاءل يجي يبشرني بـ النبأ السعيد ده ... !!
عشان أبدأ .. أنا مستنيه أهو .. أما نشوف أخرتها ... !!
عندكم بلوج .. مـ عندكمش بلوج ...
المهم إنكم تبشروني ... بأي شكل ...
دوسوا التعليقات فـ آخر البوست ...
- أو لو معاكم لينك البوست على طول .. هـ تلاقوا كلمة إرسال تعليق -
إختاروا الاسم/عنوان URL ...
و اكتبوا أي نيك نيم و قولوا إن في حد معايا ... !!
و بلاش التعليقات اللي فـ الشات بوكس على قد مـ تقدروا ...
عشان لو الشات بوكس جراله حاجه و فيه تعليقات هـ أتحسر عليها ...
و عشان كمان الناس تاخد بالها إن فيه ناس كتير عايزه تتفاءل ... !!!
الفرصه دي مش بـ تيجي غير مره كل كام قرن ... !! D:
حد يستغل الفرصه دي بقى .. و يقول انه ناوي يتفاءل ... !!
ها مين جاااااي ... ؟؟!!
- عارفين لو أحبطوني .. انتوا حرّين بقى !! -
أقل من 10 تعليقات ..... مش لاعبه ........ !! D:
***
!! ... تحديييييييييييييييث ... !!
لو جالي إحباط تاني .. مـ حدش يعاتبني ... !! :(
ربنا يسامحكو ...
شكل الناس عاجبها إحباطها اللي هي فيه ... !! :(

2009/01/24

سئـــــــمت .. !!

سئمت الحياة ... و دوام الحروب
سئمت الدماء ... و تكبيل القيود
سئمت المدافع ... و تتابع القذائف
سئمت التنقل ... وسط الجنود
سئمت المشي ... بين الدروب
سئمت الإختفاء ... لأجل الهروب
سئمت البكاء ... و كثرة الرثاء
سئمت الدمار ... و بكاء الأطلال
سئمت السبي ... و ذبح الشيوخ
سئمت الإحتلال ... و موت الألوف
كما سئمت أذهـــان دائمة الشـــرود !!
***
كنت كاتباها من زمان .. بتاريخ 5\2\2007 تقريباً ...
عارفه إنها مش متظبطه برضو زي أغلب الحاجات ...
بس حسيت إني عايزه أنزلها .. فـ نزلتها ... !! :(

2009/01/18

عارف .. ؟؟!!

عارف لما الدنيا بتقفل ..
و بيبانها فـ وشك تـ تقفـِّـل ؟؟!!
عارف لما تدوق المر ..
و الأيام مش راضيه تمر ؟؟!!
عارف لما تعيش محتاس ..
قاعد وحدك وسط الناس ؟؟!!
عارف لما تقعد وحدك ..
و مـ فيش حد راضي يودَّك ؟؟!!
عارف لما تبني آمال ..
أعلى من كل جبال ..
و موجه بسيطة تيجي تهدَّك ؟؟!!
عارف لما تعيش وحدك ..
و حد غيرك ساكن قلبك ... !!
***
معلش طالبه معايا كده بقى ... !! :(
مش عارفه إيه آخرة التوهان اللي أنا فيه ده ... !! :(
مش فاكره دي كانت محاوله كـ مداخله على حد .. ولا كانت لوحدها ... !!
كنت كاتباها من زمان بس مش قوي .. و كان عندي أمل إنها تتظبط ... !!
بس نزلتها .. لإن الأمل قليل قوي إنها تتظبط ... !!
و لإني حاساها دلوقتي بالذات ... !! :(
!! ... بس خلاص ... !!
- دعواتكم -

2009/01/15

Don't Care Logically ... !!


زي مـ إتعلـّمنا فـ الـ logic ... قاعدة الـ don't care ...
***
الـسؤال يجي يقولك ...
إعمل simplify بـطريقة الـ don't care ...
إزاي بقى بـ نحل ... ؟؟!!
بنعمل care لـ للحاجات اللي هـ تفيدنا فـ الـ simplify ...
don't care لأي حاجه مالهاش لازمه و مش هـ تفيدنا ... !!
***
إعمل simplify - لـ حياتك و نفسك - ... !!
care لـ مصلحتك ... !!
don't care لأي حاجه أو حد مـش بتستفيد منه ... !!
هو ده logic الحياة ... !!
***
السؤال هنا ...
إزاي فيه ناس بـ تقدر تستخدم قاعدة الـ don't care حياتياً ... ؟؟!!
***
ملاحظه : ممكن فكرة الموضوع مـ توصلـّش لبعضكم بـ سهوله ...
لإنكم محتاجين تكونوا عارفين ع الأقل قاعدة الـ don't care ...
بعتذر لأي حد مـ وصلتلوش الفكره ... !! :(