كلاكيت تاني مرّه .. !! (CLOSED)

السلام عليكم و رحمة الله و بركاته
للمره التانيه ع التوالي حاجه مقفوله ... !!
بس المره دي تختلف كتير عن قبل كده ...
رغم إني بحب البلوج بتاعي جداً ...
- لإني غالباً بلاقي نفسي فيه -
و رغم إنه بيكون من ضمن أول الحاجات اللي بلجألها فـ أي وقت ...
- بقول و لو حبة حاجات جوّايا -
و رغم إني هـ أفتقده جداً الفتره الجايّه ...

... رغم كل حاجه ...
إن شاء الله هـ أدّيلكم أجازة مني و من بلوجي ...
و أدّي لـ بلوجي أجازة مني ...
و أدّي لـ نفسي - قبلكم - أجازة ... !!
***
محتاجه فعلاً فترة أحاول أرجع فيها لنفسي ...
اللي دايماً كل مـ أبدأ أحس إني قرّبتلها .. بكتشف إني لسه بعيده ... !!
و يمكن أحياناً كمان بـ أبعد أكتر ... !!
محتاجه أرجع لنفسي .. عشان ألاقيني ... !!
خصوصاً بعد الأيام اللي فاتت دي ...
محتاجه أرجع - أنا - زي مـ كنت .. و أحسن ... !!
محتاجه أرجع لـ ربنا قوي قوي ...
حاسه إني محتاجه حاجات كتير أساسيه المفروض تكون معايا دايماً ... !!
***
كان نفسي آخد راحه من الإرتباط بالناس و الكلية و كل حاجه ...
بس - للأسف - ده واقع مجبره أحتك بيه ...
و طبيعي .. مـ أقدرش أعيش من غير الناس ...

يارب بس يكون في أي نتيجة لأي محاوله مني ...
و يارب أي إحباط أو أي حاجه بترجّعني أقدر أبعد عنها ...
بالله عليكم .. محتاجه دعواتكم قوي ...
***
ملاحظة : أكيد هـ آجي أبص ع البلوج كل فتره ...
و يمكن أتابعه زي الأول عادي ... !! :(
يمكن ع الأقل دي راحه تدوينيه .. الله أعلم ... !!
كلاكيت تالت مرّه : إعتذار عن الخطوة التانيه ...
بإذن الله بعد رجوعي .. هـ أكون أحسن و مش هـ اتأخر عليكم ...