2008/09/30

دعوة عامة للتسامح .. !!

لو حد مَدحَك .. أو قالك كلمة حلوة ...
قوله : آميـــــــن ... ♥
يعني إعتبرها دعاء ليك بالصفة الحلوة دي ...
و لإن من طبع أي إنسان الكِبِّر و الإعجاب بالنفس ...
عشان كده .. حاول تتعود و تقول آميـــن ...

لو حد غلط فيك .. أو قال عليك حاجه وحشة ...
قوله : جزاكَ الله خيراً ... ♥
و اكظم غيظك .. و سيبه .. مـ تحاولش تجادل معاه كتير ... !!
بعدها .. اقعد مع نفسك شويه .. و وجِّه تفكيرك لـ طريقين ...

أول طريق : اللي حصل ده تنبيه من ربنا ليك ...
راجع نفسك .. و شوف هل انت فعلاً فيك الـ حاجه اللي فلان قالها عليك ... ؟؟!!
و بيها .. حاول تغيير الحاجه دي بالتدريج ...
و بـ كده الكلام الوحش اللي اتقال عليك .. خير ليك و فـ مصلحتك ...

و لو لقيت إن اللي اتقال عليك مش فيك ... روح للطريق التاني ...

تاني طريق : اللي حصل ده إبتلاء من ربنا ...
إحمد ربنا .. و صفِّي قلبك من ناحية - فلان - اللي قال عليك الكلام ده ...
و اتأكد إن الإبتلاء ده لو صبرت عليه .. بيزوّد حسناتك ...
و بـ كده .. الكلام الوحش اللي اتقال عليك .. خير ليك - برضو- و لمصلحتك ...
[Fasla.gif]
مره زين العابدين ( ابن الحسين-ابن علي ابن ابي طالب-زوج فاطمة الزهراء )
كان فـ مجلس بينصح الناس و بـ يصلي بيهم ...
- كان معروف عنّه التقوى و الورع -
و فجأة دخل عليهم واحد و سبّه قدّام الناس الموجوده ...
زين العابدين سابه يخلص كل اللي عنده , راحله و قرّب منه ...
و قالـّه - فيما معناه - إن أنا فيّا كل الحاجات اللي انت قلتها ...
و فيه حاجات كمان أوحش منها مـ يعرفهاش غير ربنا ...
الراجل اللي سابّه .. قعد ع الأرض و بكى و اعتذرله ...
قاله : إن كان فيه مجموعة من الناس ...
قالولي لو عرفت تخلّي زين العابدين يغلط فيك هـ نديك 1000 دينار .. !!
عشان كده أنا سبّيتك ...
( ده بيعلمنا إزاي فعلاً نتصرف مع المواقف دي بحكمة )
[Fasla.gif]
- الكلام ده من حلقة لـ حبيب الجافري ...
انا مشوفتهاش بس ماما حكيتلي عليها .. يارب أكون وصلتها صح ...
و ربنا يسامحني لو كان فيه حاجه غلط قلتها سهو مني -
أنا عارفه إن الإسلوب مش حلو ...
و أكيد كان ممكن يطلع أحسن من كده ...
بس معلش حاولوا تستحملوا .. و تسامحوني بقى ...
المهم من كل الموضوع .. إننا نعمل دعوة عامة للتسامح مع كل الناس ... ♥
[Fasla.gif]
مش عارفه - كالعاده برضو - ايه لازمة البوست ده ... ؟؟!!
بس يمكن عشان أقول لواحده ....
رغم إنك عرفتي إني زعلانه منك .. و محاولتيش تعرفي السبب ...
بس أنا سامحتك .. و إن شاء الله تكون من قلبي ... ♥
و أقول لكل الناس ...
مسامحة إن شاء الله أي حد زعلني من قلبي ... ♥
و كمان عشان أطلب من كل الناس ...
إني لو كنت زعلّت أو غلطت فـ حق أي حد ياريت يسامحني ... ♥
- كل سنة و انتم طيبين بقى -
مرسلة بواسطة في
التسميات:

هناك 18 تعليقًا:

  1. غير معرف1/10/08 8:38 م

    السلاااااااااام عليكم

    التسامح كلمة المفروض تبقي معانا علي طول
    لان فيه كتير اوي بيزعلنا ومن غير سبب ومش عارف ليه
    فلازم تكون دايما تكون معانا لان من غيرها الانسان مش هيعرف يعيش
    وجنب التسامح لازم يكون فيه قلب صافي يسامح مش المظهر بس او الكلام بس
    ولازم الابتسامه

    ^_^

    لانها شيء مهم جدا جدا
    الابتسامة كلمة طيبة من غير حروف
    ولازم الكلمه الكويسه
    ولازم....ولازم....ولازم

    الحياه فعلا بقت صعبة جدا ومحتاجه كتير
    وعجبتني جدا الحكمه دي :-

    كل الظلام الذي في الدنيا لا يستطيع أن يخفي ضوء شمعة مضيئة
    عشان كده لازم نسامح عشان نبقي زي الشمعه دي

    والاهم قلب صافي وإيمان قوي
    اسف اني طولت بس الموضوع عجبني
    اياً كان طريقه الكتابه
    شكرا.
    السلااام عليكم

    ردحذف
  2. fOsDö2ä2/10/08 4:25 ص

    $$ ThE UnKnOwN $$ ...
    و عليكم السلام و رحمة الله و بركاته
    كلامك مظبوط جداً .. و واقعي جداً ..
    التسامح حاجه لازم تكون جوّانا ..
    يمكن وجودها مش بالسهوله دي ..
    بس الواحد يحاول على قد مـ يقدر ...
    الحكمة جميلة قوي فعلاً ...
    و يارب نكون شموع مضيئة و مميزة دايماً ...

    شكراً على ردك المميز اللي سعيدة بيه ... (f)

    ردحذف
  3. قلم رصاص3/10/08 1:48 ص

    السلام عليكم ورحمة الله وبركاته

    ازيك يافسدقة اولا

    بصراحة البوست المرة دي جميل جدا

    والفكرة عجبتني أكتر

    التسامح محتاج مرونة في التفكير العقلي ..
    لأنه القلب دايما بيكون قريب للتسامح والحب والتواصل مع الاخر عن العقل

    وليس بالضرورة يكون الانسان مهيأ نفسيا للتسامح .. بالعكس

    هناك أناس بيكونوا متشددين جدا جدا جدا .. ويسامح غيره بمجرد مايسمع منه كلمه طيبة واحدة فقط

    الفكرة بجد حلوة .. والأسلوب فوق العادة يافسدقة وبلاش تواضع بقى
    ههههههههههه

    وكل عيد وانتي بخير وصحة وسلامة

    تقبلي مروري

    ردحذف
  4. Teawater3/10/08 2:15 ص

    اولاً
    كل سنه وانتي طيبه

    ثانياً
    البوست ده كويس جداً كمان طريق العرض كويس وشبه الحلقه متقلقيش

    ثالثاً
    حلو منك مووت انك تهتمي بحاجه كبيره زي التسامح بس ديه يا فستقه محتاجه بوستات مش بوست واحد

    جزاكي الله خيراً

    تقبلي مروري

    ردحذف
  5. fOsDö2ä3/10/08 1:37 م

    قلم رصاص ...
    و عليكم السلام و رحمة الله و بركاته
    ازي حضرتك يا قلم ... ؟؟
    القلب و العقل غالباً متعارضين مع بعض ... !!
    أحياناً العقل بيكون صح .. و نادراً القلب بيكون صح .. !!
    ( ده المنتشر يعني .. بس فـ التسامح طبعاً القلب صح )
    فعلاً الإنسان مش لازم يكون مهيأ ...
    و بتحصل كتير قوي بـ مجرد كلمة حلوة كل حاجه بتختفي ..
    -بس لما مـ يكونش فيه كلمة حلوة الموضوع بيبقى صعب فعلاً-

    سعيدة برأيك ع البوست ..
    و لو إني مازلت مصممه إن الإسلوب كان ممكن يطلع أحلى من كده بكتير ...

    كل سنة و حضرتك طيب ... (f)

    ردحذف
  6. fOsDö2ä3/10/08 1:47 م

    teawater ...
    أولاً:كل سنة و انتِ كمان طيبة ...
    ثانياً:الحمد لله .. يعني فيه أمل ... ؟؟!! D:
    ثالثاً:المهم الوحد يقدر يثبت ع الحاجات الحلوة ..
    و أنا شايفه إن موضوع التسامح ده أبسط مما يكون ..
    كل الموضوع نيّه سليمة .. و قلب صافي .. و ثقه فـ الله ..
    - أعتقد ده المطلوب عشان تسامحي يعني -
    إنما لو هـ نتكلم على آيات قرآنية وأحاديث شريفه ..
    فـ الموضوع طبعاً هـ يكون أكبر من كده بـ كتير ...

    شكراً يا شوشو ع التعليق ...
    جزانا الله و إياكي إن شاء الله ...
    منوره ... (f)

    ردحذف
  7. Hossam6/10/08 2:25 م

    سلام عليكم
    موضوعك عجبنى اوى
    ووالله فعلا هسمع بنصيحتك وهستفاد من الحالتين
    تقبلى مرورى
    سلام

    ردحذف
  8. ناعومى7/10/08 4:51 ص

    دعوه للتسامح جميله
    بس انا بعترض على سذاجه التسامح
    اللى ساعات بيضيع ابسط حقوقنا
    اسفه ياقمريتى الحلوه
    واللى نفسى يبقى عندى بنوته شبهها بجد والله
    بس فيه ناس علمتنى ابطل اوزع مسامحتى سبيل
    وحتى التسامح له قوانين
    ومن عندك بقول لاى حد انا زعلته بدون قصد سامحنى
    واى حد زعلنى بدون قصد انا مسمحاه من قلبى
    لكن اللى اذونى عن عمد
    اسفه مش حقدر اسامحهم ابدا

    بوست جميل زى صاحبته الجميله

    ردحذف
  9. fOsDö2ä9/10/08 4:48 م

    Hossam ...
    و عليكم السلام و رحمة الله و بركاته
    يارب أكون عند حسن الظنون دايماً ...
    و يارب كلنا نقدر نفكر بالطريقه دي ...
    و نثبت على التفكير ده ...
    منور يا فندم ... (f)

    ردحذف
  10. fOsDö2ä9/10/08 4:58 م

    ناعومى ...
    كلامك مظبوط للأسف ...
    أغلب الناس بيستغلوا التسامح بطريقه تدايق قوي ...
    بس أنا شايفه إن طالما انتِ بتحاولي تسامحي عشان ربنا يرضى عنّك ...
    يبقى دي كفايه قوي .. و مش محتاجه قوانين و لا غيره ...
    الموضوع مش سهل خالص أنا عارفه ...
    خاصةً لو كان الأذى مش بسيط ...
    بس أهو نحاول ...
    و بعدين ده انتِ قلبك كبييييير ...

    منوره يا نوعناعتي ...
    يارب تنوريني دايماً كده ... (f)
    و تفضلي بطيبة قلبك دي ... (l)

    ردحذف
  11. دعـاء عـلى14/10/08 9:30 م

    اوعى تكونى زعلانه منى يا قمر عشان ما بجيش أزورك
    انت عارفه الحاله الصحيه المتدنيه للجهاز بتاعى (:
    و زى ما قلتى التسامح معنى جميل جدا
    و اللى بيحطه فى قلبه بيكبر بيه جدا عند ربنا و عند الناس اللى بتقدر مش اللى بتقول على التسامح عبط
    بوست حلو جدا على فكره ... يا رب الكل يسمع كلامك و يقلبها تسامح عشان تلمى حسنات آآآآآد كده (:
    يلا سلامات و دعواتك للجهاز بتاعى

    ردحذف
  12. romansy15/10/08 9:25 م

    ايه الروح الجميله دى
    انتى فعلا قلبك كبير
    قولى ااااامين
    ياريت فعلا الناس تسامح بعض
    علشان يتحسن حالنا شويه

    تقبلى مرورى

    ردحذف
  13. fOsDö2ä15/10/08 10:23 م

    دعاء على ...
    لا يافندم .. أنا أقدر أزعل يعني ... ؟؟!! D:
    كلامك عن التسامح مظبوط ...
    مهما كان فـ نظر أغلب الناس عبط ... !!
    كفايه إن الواحد مقتنع إن الحاجه دي صح و ترضي ربنا ...

    و بعدين يعني .. ؟؟!!
    باصالي فـ الحسنات اللي ربنا ممكن يرزقني بيهم .. ؟؟!! D:
    يا ساتر يارب .. حتى فـ دي ... ؟؟!! D:

    منوره يا جميل ... (f)
    ربنا يشفي جهازك يا رب .. قولي آمين ... !! :)

    ردحذف
  14. fOsDö2ä15/10/08 10:29 م

    romansy ...
    آمـــــــين .. آمـــــــين ..آمـــــــين ...
    آمـــــــين الأولانيه عشان الكلمتين الحلوين ... :$
    و آمـــــــين التانيه عشان ربنا يهدي كل الناس و تقدر تسامح ...
    و آمـــــــين التالته عشان حالنا يتصلح ...

    قول آمـــــــين بقى ... D:
    منور يا رومانسي ... (f)

    ردحذف
  15. ياسمين نعمان16/10/08 10:59 م

    السلام عليكم .. أنا أول مرة أدخل على مدونتك و عجبني الموضوع ده أوي ..
    جزاك الله خيرا .. و على فكرة في دعاء مأثور جميل أوي تقوليه لو حد مدحك و هو " اللهم لا تؤاخذني بما يقولون و اجعلني خيرا مما يظنون و اغفرلي مالا يعلمون"

    ردحذف
  16. fOsDö2ä17/10/08 8:08 ص

    ياسمين نعمان ...
    و عليكم السلام و رحمة الله و بركاته
    جزانا الله و إياكم ...
    "اللهم لا تؤاخذني بما يقولون و اجعلني خيرا مما يظنون و اغفرلي مالا يعلمون"
    الدعاء سمعتعه قبل كده .. و جميل قوي ...
    المهم نفتكره فـ الأوقات دي ...

    شكراً يا ياسمين على وجودك ... (f)
    و يارب تنوريني تاني ... :)

    ردحذف
  17. yomna25/10/08 10:41 م

    لو حد غلط فيك .. أو قال عليك حاجه وحشة ...
    قوله : جزاكَ الله خيراً ... ♥
    و اكظم غيظك .. و سيبه .. مـ تحاولش تجادل معاه كتير ... !!


    والله انا ساعات بسكت ... بس بسكت عشان مش ببقي عارفه ارد.. بحس اني لو اتصرفت فعلا هتهور جامد.. البوست ده علي فكره جامد اوي تسلم ايدك

    ردحذف
  18. fOsDö2ä26/10/08 8:47 ص

    أخصائي إجتماعي تحت التمرين(يمنى)...
    أولاً : سعيدة بوجودك .. و سعيدة أكتر لإني إكتشفت إننا من بلد واحده كمان ... !!
    ثانياً بقى : تصرفك برضو بيحصل كتير ...
    و ده بينطبق عليه "و الكاظمين الغيظ"
    و للأسف برضو بعض الناس بتعتبر رد الفعل ده جبن أو خوف ...
    بس سيبك انتِ الأهم عند ربنا ...
    يارب يقدرنا إننا نتعامل بالطريقة الصح ...

    منوراني يا قمرايه بأول زيارة و يارب مـ تكون الأخيرة ... (f)
    يارب أشوفك تاني بقى ...

    ردحذف

شكراً لو علقت .. و لو معلقتش برضو ... !! D:

الاشتراك في: تعليقات الرسالة (Atom)