سادس و آخر يووووووم ... !!

الأربعاء الموافق 11/06/2008 :
إمتحان Math ... !!
المفروض كان عندي وقت أبدأ المذاكره من يوم السبت لـ حد التلات ...
بس مش عارفه ايه الكسل اللي نزل عليّا أكتر مـ هو نازل .. !!
آخر إمتحان بقى .. و الرياضه معقوله و ممكن تتلم ...
ذاكرت يوم الاتنين .. نص ساعه مثلاً كده بحالها ... !!
و التلات إكتشفت إني مزنوقه و إضطريت للأسف أذاكر ... !!
ذاكرت شويه .. و على آخر اليوم خلاص فصلت ...
نويت أصحى ع الساعه 4 ...
عشان أراجع على حاجات مهمه .. و أبص ع الإثباتات ...
لقيتني فجأه بصحى على رنة الموبايل .. و آلاء بترن ...
يالهوي الساعه كاااااااااام .. الشمس طلعت .. !!
أبص فـ الساعه أكتشف إن الساعه 8 إلا تلت تقريباً ... !!
و آلاء بتتصل تاني ... !!
رديت على آلاء .......
أيوه يا فدوى إزيك ... ؟؟؟!!
إيه الأخبار .. خلصتي ولا لسه ... ؟؟!!
جاوبت على آلاء .. و آلاء طبعاً إتصدمت ... !!
و قالتلي : لسه بدري كمللي انتِ بس ... !!
قفلت مع آلاء .. و مش عارفه أعمل إيه و لا إيه ... !!
حاولت أبص على أي حاجه بسرعه ...
و بصيت ع الإثباتات فـ ثواني ...
و اللي وقف .. عديته ... !!
عااااااااادي جداً ... !!
رحت الإمتحان .. أعصابي طبعاً بايظه كالعاده ...
عايزه أبص على حاجات لسه .. حاسه إن كله دخل فـ بعضه ... !!
خلاااااص مفيش وقت ... :((

و كالعاده .. يوم الإمتحان يُكرم المرء أو يهان ... !!
ورقة الأسئلة ماشاء الله يعني .. اللهم لا حسد .. !!
مليانه أسئلة كتيره ... إيه الأسئلة دي كلها .... ؟؟!!!
الدكتور بتاع المادة : حلـّوا 4 أسئلة من 6 ... و سؤال من 2 ...
طيب سيادتي هـ حل ايه بالظبط ... ؟؟!!
إتصدمت طبعاً و أنا ببص ع الأسئلة عشان أختار بينهم ...
أغلب الإمتحان إثباتات .. اللي سيادتي بصيت بسرعه عليها ... !!
مش عارفه أختار ايه بالظبط ... !!
بعد مـ أختار الاقي خطوه واقفه ... !!
أشوف طيب سؤال تاني ... أبدأ أحل فيه و هكذا ... !!
قلت خلاص بلاها ...
أنا هفضل ع اللي أنا حالاه و مش هـ حل أسئلة زياده ...
رغم إني كنت ناويه ... بس طبعاً مفيش وقت ... !!
قلت أروح للسؤالين التانين .. عليهم درجات كبيره ...
بصيت .. قررت أختار الأولاني ....
جيت أحل .. كله دخل فـ بعضه ...
و اسئلة مش عارفه أعمل فيها أي حاجه ... !!
قلت أبص ع السؤال التاني ...
و قررت إني أحله .. يمكن يكون أحسن ... !!
حليت فيه أحسن مـ الأولاني الحمد لله ...
بس طبعاً طبعاً أعصابي كانت خلاص ...
لإن المعلومات بـ تيجي ع الآخر و ببتدي أفتكرها ... !!

طبعاً فـ نص الإمتحان بعد مـ اتصدمت مـ الإثباتات ...
و السؤال الأولاني من الـ 2 معرفتش أحل فيه كويس ...
و الوقت خلاص .. قرّب يخلص ... !!
كانت طبعاً الفكره الجهنميّه بتاعتي بتقوللي ...
قومي إمشي أحسن ...
و إمتحان الشفوي اللي بعد النظري طنشيه ... !!
مـ انتِ كده ... كده ...
باين هتشيلي الرياضه اللي كنتِ ضامناها إلى حد ما ... !!
بس الحمد لله حاولت أحل السؤال التاني .. و طبعاً إمتحنت الشفوي ...
كاااااان إمتحان تحفه ...
سؤال واحد لـ 5 .. و كله خد 10 تقريبا معاده واحده بس ... !!
ثواني و خلصنا الشفوي ... !!
و خلصنا الإمتحانات ... !!
و خلصنا من ضحايا الإمتحانات ... !!
تفتكروا بقى مين الضحيـّه ..... ؟؟!!
الطلبة .. و لا الدكاتره ... ؟؟!!

ملحوظة على جنب : أخدنا طبعاً الأجازه ...
و بلا فخر هي يومين .. ويوم منهم خلص ...
باقي يوم .. و نبدأ قال إيه .. تدريب صيفي ... !!