بحبه يا بابا .. بحبه .. !!

بدون مقدمات .. نخش فـ الموضوع على طول ...
بس قبل الموضوع لازم تفهموني صح .. عيب يعني ... !!
هـ تكملوا الموضوع ...
جميل جداً .. خير و بركه .. يبقى إتفقنا ... !!
مش هـ تكملوا ...
يبقى بلاش تقروه .. لإن كده الدنيا هـ تبوظ خالص ... !!
نبدأ على بركة الله ... ؟؟!!

الــــــــبــدايــــــــة ...
أول مـ شفته .. كنت بخاف منه الصراحه ... !!
أصله واد أبيضاني كده و عسول قوي ...
و كمان عينيه .. تجنن .. عسلي تحفه ... !!
مـ كنتش متخيلاه عسول كده زي مـ سمعت ...
أول مـ شوفته مـ صدقتش إن ممكن يكون فيه حد عسول كده ...
عشان كده كنت بخاف منه .. و يمكن زي مـ بيقولوا ...
القرد فـ عين امه - قصدي حبيبته فيما بعد بقى - غزال ... !!
البداية .. كانت عاديه ...
أكيد كنت بحبه بس مش للدرجه دي ...
سيبنا مـ البداية دلوقتي ...
نكمـّل اللي حصل بعد كده .. عشان مـ اطوّلـّش عليكم ...
فــيــمـــــــا بـــــــعـــــد ...
بدون مـ اكدب عليكم .. كنت تقريباً بشوفه يومياً ...
و فجأه .. أختفى و اختفت أخباره معاه ... !!
لمدة يومين مـ اعرفش عنه أي حاجه ...
بصراحه من يومها .. إكتشفت إني بحبه قوي ...
كان عندي صور ليه ع الكمبيوتر ...
و صدفه عيني جات على صوره مـ الصور ...
عينيا دمعت .. و كنت على وشك إني أعيط ... !!
رغم إني مـ عيطش عليه قدام أي حد ...
لإني مـ كنتش عايزه أي حد يشك فـ حاجه ... !!
بس جوّايا كنت زعلانه عليه جداً ...
خصوصاً انه طالما أختفى ...
كان من المؤكد اني مش هشوفه تاني ... !!
بس سبحان الله .. كان فيه حاجه جوّايا بتقوللي ...
لأ ده هيرجع .. أكيد هيرجع ... !!
أول مــ ســـمــــعـــــتـــه ...
سمعته .. و شفته ... بعد يومين غياب ... !!
مـ كنتش متخيله بجد .. سمعته بينادي عند باب الشقه ...
فتحتله .. و كان شكله زي مـ بيقولوا ...
يصعب ع الكافر ... !!
وكل رد فعلي اللي عملته ...
إني فضلت أنادي و أصوت و أعيط و أنا مـ تنحاله... !!
ماما و بابا جريو .. ايه العبيطه دي بتصوت كده ليه ... ؟؟!!
و من هنا فضيحتي كانت بجلاجل ... !!
كل شئ انكشف و بااااان ... !!
و كل البيت عيـّط عليه .. و على رجوعه ... !!
مـ كنتش متخيله إن رد الفعل هيكون كده من البيت ... !!
يا حرام بجد اتعذب يومين بايت فـ الشارع ...
لا أكل ولا حتى شرب ... كان هـ يموت فعلاً ...
- الحمد لله انه رجع بالسلامه -
و من ساعيتها ...
اكتشفت إن كلنا بنحبه .. مش لوحدي بس ...
و من ساعيتها ...
بقى قرّيب مني قوي ... لما يشوفني زعلانه ...
يجي جنبي و يفضل يلحسني ... !!
آه يلحسني .. مـ هو القط بتاعنا بقى ... !! D:
بـ ابقى عايزه اقوله ...
يعني انت الوحيد اللي حاسس بيـّا و جاي تلحسني ... !!

هههههههههههههههههه
كل إشتغاله و انتوا طيبين ...
ممكن اللي يكتشف الكلام اللي فـ الآخر ده يتريق ... !!
أنا يمكن كنت كده فـ الأول .. لما أسمع حاجه كده أتريّق ... !!
بس بجد .. لما تتعودوا على حد هيحصل كده , و أكتر من كده كمان ... !!
ده فيه حاجات كتير مـ اتقالتش .. بس أنا حبيت أختصر قدر الإمكان ... !!
كنت ناويه أحط صورته .. بس خليها بعدين بقى ...
عشان الموضوع مـ يتكشفش بسهوله ... D:
إحتمال تلاقو الصوره فـ التعليقات ... !!
و اللي عايز يعلـّق .. يعلـّق بس بالراحه يعني ... !!
معلش طالبه معايا تهييس قوي النهارده ... !!