الكتاب خير جليس .. !!

الكتـــــــــــــــــــــــــــــاب ...

عرفنا من و إحنا صغيرين جملة ...

الكتاب خير جليس ...

أخدنا كلام كتير عن الكتب .. و القرايه .. و أهميتهم ...

القرايه يمكن مش من الهوايات الأساسية بالنسبالي ...

رغم إني حابه القرايه .. بس للأسف مفتقداها قوي ...

خاصة ً قراية الكتب .. لإن النت غيّر حاجات كتير قوي فـ حياتنا ...

القرايه من كتاب .. تختلف كتير عن القرايه ع النت ...

مش عارفه بـ احس إن ليها طعم تاني بصراحه .. و بتفرق قوي ...

كل ده رغم إن قرايتي للكتب للأسف تكاد تكون منعدمه ... !!

مش هرغي كتير .. و مش هـ أتأخر أكتر من كده ...

الموضوع بما فيه ...

إن البشمهندسه الجميلة ريـــــــــم بعتالي واجب من كام يوم كده ...

فـ أنا جيت عشان أحلـّه أخيراً ... !!

مبدئياً كده مـ تتصدموش مـ الإجابات ... !!

و سامحوني بقى أصلي - كالعاده - مش مذاكره كويس ... !!

بس إن شاء الله ناويه أذاكر .. دعاوتكم ...

نشوف الأسئلة سريعاً كده بقى ...

ما اسم أول كتاب قرأته في حياتك بإستثناء القصص و الكتب الموجهة للأطفال؟

صراحه على مـ أفتكر انه كان الفئران المتوحشه ...

كان صرعة أو صرخة الرعب ... !!

من غير تريقه لو سمحتوا ... !! D:

حدثنا عن 3 كتب قرأتها و تمتعت بها .. و انصح الأخرين بقراءتها !!

زي مـ قلتلكم فوق ...

قرايتي للكتب مش كتيره قوي و للأسف تكاد تكون منعدمه ... !!

عشان كده مـ أقدرش أحدد كتب معينه ... !!

يمكن قرّيت لـ فاروق جويدة.. حبيبتي لا ترحلي ...

قريّت رباعيات صلاح جاهين .. تقديم يحيى حقى ...

كان تبع مهرجان القراءة للجميع سنة 96 ...

( واحده صاحبتي عرفت إني بحب جاهين جداً .. و لقيته عندهم فـ المكتبة )

الأبنودي .. بعد التحية و السلام ... بس مـ خلصتوش كلـّه ... !!

قريّت جزء من كنوز المعرفه .. لـ د.أيمن أبو الروس ...

( عجبني فيه معلومات كتير متنوعة و حلوة )

ده غير بقى حاجات الأطفال .. ميكي , ماجد , بلبل , العربي ... إلخ ... !! D:

و القرايات المتفرقه بقى .. حاجات مختلفه عن بعضها ...

الحاجات دي غير طبعاً قرايات النت .. لإن النت حاجه تانيه خالص ... !!

حدثنا عن كتاب قرأته و تمنينت انك لم تفعل ؟؟

مش عارفه .. مـ أعتقدش إن فيه كتب مش مفيده عموماً ...

بس أنا بتغاظ فـ القصص الخيالية قوي لما النهاية تبقى مستفزه ...

مع إن نهايتها أكيد لازم تبقى مستفزه ... !! D:

الكتاب الذي تقرأه حاليا في حالة وجوده ؟؟

بما إن الحاله النفسيه مش مساعده خالص ...

و إني مخاصمة الكتب غالباً ... !!

فـ مفيش - للأسف - حالياً حاجه بقراها ... !!

بس ناويه إن شاء الله أبدأ بـ أجاثا كريستي ...

عشان نفسي أقرالها لإني بسمع عنها كتير ...

ناويه كمان على حاجات دينية مبسطه ...

لإني بـ أحس إني مسلمة إسماً بس ... !!!

نفسي كمان قوي أقرا لـ ناس كتير معرفتي بيهم كانت ع النت ...

زي ناعومى , د.محمد الدسوقي , د.عمرو عز الدين , ا.محمد ابراهيم محروس ... إلخ

أي حد مـ الأسماء الكبيره اللي شوفتها ع النت ...

الواجب بقى المفروض إني أبعته لـ 6 ...

ا.إيهاب رضوان ( دخل الشتا ) ...

الجميلة نورانة ...

د.عمرو فاروق ( كلام من القلب) ...

هـ ابعته تاني لـ ...

الجميلة قوي د. ناعومى ...

د.محمد الدسوقي ...

د.أحمد ( وجه جديد ) ...

معلش الواجب مش مركزه فيه كويس ...

بس كان لازم أحله عشان مـ أتأخرش عن كده ...

شكر خاص جداً جداً لـ ريـــــم ...

و سامحيني بقى عشان حل الواجب مش مثالي ... !!