الأسرار الـ 6 .. ؟؟!!

ساعات بنحب نتكلم عن نفسنا .. و نقول اللي جوّانا ...
بس يمكن مـ أتعودناش نتكلم ... !!
و ساعات بـ نتمنى أي حد يسألنا عن نفسنا .. و يعرف أحوالنا ...
و نلاقي الكلام صعب أوي إنه يطلع ... !!
و ساعات بنشتاق لنفسنا أوي .. و نشتاق نقرّبلها أوي ...
بس يمكن نفسنا بـ تهرّب .. و تخاف إنها تقرّب لـ نفسها ... !!
ساعات كتير غريبه و محتاجه مليون تفسير ... !!

أنا دايماً بـ احس إن الإنسان متناقض أوي ...
و ساعات أحس إن يمكن أكون أنا بس ... !!
مش عارفه الكلام ده ايه لازمته ...
بس هو طلع كده .. أقولّه لأ يعني ... ؟؟!!

ناعومى حبيبتي ...
شكر خاص جداً جداً جداً ع الواجب اللي دبستيني فيه ...
و فيه حاجه عايزه أقولهالك قبل مـ أبدأ أجاوب ...
ساعات كتير بـ احس إني مقصرّه معاكي أوي ...
و ساعات كتير بـ احس إني مفتقداكي أوي ...
و ساعات كتير بـ ابقى عارفه إني مهييسه أوي ... !!
( زي دلوقتي كده بالظبط )
مش عارفه ساعات معلقه معايا أوي كده ليه ... ؟؟!!
مع إني والله مـ كنتش بسمع اغنية ساعات ... !! D:

المهم أفرجكوا على سؤال الواجب اللي هـ ارغي فيه كتير أوي ... !!
س : أذكر 6 أسرار قد لا يكتشفها من يقابلك أول مرة.
و دي قوانين الواجب اللي هـ ارغي فيه كتير أوي برضو ... !!

1. أذكر اسم من طلب منك حل هذا الواجب.

2. أذكر القوانين المتعلقة بهذا الواجب.

3. تحدث عن ستة أسرار قد لا يكتشفها من يقابلك للمرة الأولى.

4. حول هذا الواجب إلى ستة مدونين،وأذكر أسماءهم مع روابط مدوناتهم في موضوعك.

5. اترك تعليق في مدونة من حولت الواجب عليهم، ليعلموا عن هذا الواجب.

المفروض بقى إني أجاوب يعني ... ؟؟!!
مع إني عارفه إني مش هـ اعرف أجاوب كويس ... !!
بس أهو ... هـ احاول ...
مبدئياً كده أنا حاسه إن 6 أسرار دول كتير شويه ... !!
بس متهيألي بيجي أوقات بـ احس إنهم قليلين خالص ... !!
( عادي يعني .. مفيش إعتراض طبعاً )

المهم .. نبدأ على بركة الله ...
1. عصبـيـــه :
دي حاجه للأسف ملاحظه إنها بتزيد كل يوم عن اللي قبله ... !!
يمكن اللي يشوفوني يحسّوا إني بارده .. و أحياناً كمان بارده جداً ...
بس للأسف جوّايا بيبقى العكس تماماً ... !!
و أحياناً بكون بـ اغلى .. مش أكتر يعني ... !!
( يعني عصبيه من جوّايا دايماً .. و من برّه أحياناً )
و دي حاجه بجد بكرهها فعلاً .. و بتعصبني أكتر ... !!
لإني بـ أحرق دمي فـ الآخر .. ولا حد حاسس أصلاً ... !!

2. بـــحـــب :
هههههههههههههههههههه
مـ حدش مخه يوديه لـ بعيد ... !!
آه بحب بجد .. و للأسف غالباً بحب أغلب الناس ... !!
ممكن أحب ناس لمجرد إني اتكلمت معاها ثواني ... !!
ممكن أحب ناس مـ اعرفتش عنهم غير اساميهم ... !!
ممكن أحب ناس عشان ابتسامتهم جات مرّه فـ وشي ... !!
( للأسف بحب أغلب الناس بسهوله جداً .. و صعب إني أكرّه حد )
و دي حاجه برضو مش بحبها ...
لإني فـ الآخر بـ اتصدم كتير .. و بـ آخد على دماغي كتير أوي ... !!

3. مـش إجــتماعيه :
مـ أعرفش إزاي ... !!
الشائع غالباً .. إني إجتماعيه .. و الكلام ده صح إلى حد كبير ...
أحياناً بحب أشارك فـ حوار شدّني .. أو ليّا رأي فيه ...
و أحياناً كتير بـ ابقى نفسي اتكلم .. بس فيه حاجه بـ توقفني ... !!
و الكلام كله فجأه يضيع .. و يقف ... !!
معرفش إزاي برضو ... !!
( هههههههه .. حالتي صعبه أوي أنا عارفه )
يعني ممكن أقول إني بـ احاول أبقى إجتماعيه ...
بس أحياناً الظروف مش بتساعدني و الناس مش بتساعدني ...
و قبل ده كله .. نفسي مش بتساعدني ... !!

4. شـــقيــــه :
ههههههههههههههههههه
دي بجد يمكن مـ كنتش حاساها أوي ...
و لفت نظري ليها - من اسبوع يمكن - واحد صاحب بابا ... !!
قاعدين كلنا العيلتين مع بعض .. و بـ نتكلم عادي ...
و فجأه لاقيته بيقول .. انتِ شقيه على فكره ... !! D:
مع إني كنت عادي يعني فـ حالي ... !! D:
فـ الحقيقه أغلب الناس عارفه إني هاديه ... !!
بس متهيألي كلنا مهما كان عمرنا .. بـ نكون أشقيه و جوّانا لسه أطفال ... !!
عشان كده بجد نفسي ...
كل الناس تطلع براءة الأطفال اللي جواها .. بس من غير عقولها ... !!
( رغم إني كتير بـ احس إن البراءه دي جمله مـ لهاش أي معنى اليومين دول )

5. بـ أنسى بسرعه :
يمكن لما بزعل من حد .. بزعل فعلاً جامد ...
بالذات لما يكون حد عزيز عليّا أوي ...
و دي بـ تبقى مشكله فعلاً ...
اللي قدامي حاسس إني مدايقه .. و خلاص قفلت على كده ...
و مش هـ اعدي أي حاجه بسهوله ...
و بيخاف يقرّب يتكلم معايا .. لإني صديته مرّه مثلاً ... !!
بس للأسف الكلام ده مش صح 100 % ...
أنا أكتر واحده سهل يضحك عليها يعني بلا فخر ... !! D:
ممكن كلمتين حلوين و معاتبه أو توضيح ...
و كله بجد بيروح فـ ثواني .. و بـ اصفى على طول ... :(
أحياناً بـ ابقى عايزه أعمل العكس .. و اتقمص شويه و أغلس ...
بس غالباً للأسف دي حاجه بتحصل بـ تلقائيه أوي ... !!
لكنها فـ الآخر .. بـ تقف ع الكلمتين ... !!
يعني ممكن الكلمتين لو مـ اتقالوش .. فعلاً بـ أبقى وحشه ... !!

6. بــحــب مصـــر :
مش عارفه .. كل لما أفكّر فـ الموضوع ده و أقول الكلام ده ...
بـ احس أحياناً إني بضحك على نفسي ... !!
بس بجد غالباً بـ ارجع أقول أنا بحب مصـر .. و بـ اقولها من قلبي ...
يمكن الظاهر إني مش عاجبني حاجه .. و كارهه مصـر ... !!
أنا فعلاً كارهه .. بس كارهه تصرفات ناس فـ مصـر ... !!
كارهه اللي مصـر وصلت ليه .. كارهه كل اللي بيحصل ... !!
إنما مصــر ..... بحبها أوي ...
يمكن أكتر مره حسيت بيها إني بحب مصـر .. و كانت تقريباً أول مره ...
لما سافرت بعيد عن مصـر من أكتر من سنة ...
حسيّت بـ قيمتها بجد ... !!
لما شفت إزاي مصـر حلوه أوي .. و ناسها حلوين مهما عملوا ...
لما كنت قاعده فـ عاصمه .. بدون ذكر أسم العاصمه يعني ...
و النور يقطع يومياً - تقريباً - بليل ... و فـ عز الإمتحانات ... !!
لما تحس انك غريب فـ بلد مش بتاعتك .. ناس شكلهم غريب أوي ...
لما أول مـ تسمع لهجه مصريّه عينك تجري بسرعه و تدوّر ع الصوت ...
حتى و لو هـ تكتفى إنك تسمعه من غير مـ تتعامل مع مصدر الصوت ... !!
لما أول مـ توصل مصـر بعد غربه مـ كملتّش شهر ...
و تشوف مــصـــــر ...
و تقول - بتلقائيه - من قلبك ...
يااااااااااه مصـــــــــر أم الدنيا فعلاً ... !!
( ربنا يصلح حال مصر .. و يرجعها و يرجع ناسها زي زمان )
جاهين كان قايل حاجه حلوه أوي ...
يمكن حطيتها متأخر شويه فـ المدونه .. بس إحساسها فعلاً عالي أوي ...
كان بيقول ايه عم جاهين بقى ... ؟؟!!

على اسم مصر .. التاريخ يقدر يقول ما شـــاء
أنا مـصــر عندي أحب .. و أجـــمل الأشــــــياء
بـ احبها و هي مالكه الأرض .. شرق و غــــرب
و بـ احبها و هي مـرميــّـــه .. جريحـــة حـــرب
بـ احبها بـ عنف و بـ رقه .. و على اسـتحـيــاء

متهيألي كفايه كده أوي عليكوا ...
سبحان الله كنت حاسه إني مش هـ لاقي كلام ... !!
بس الحمد لله .. و للأسف فـ نفس الوقت ... !!
لقيت كلام و رغي كتير أوي .. استحملوني بقى عادي ... !! D:

آآآآآآآآآآآآآآه شروط الواجب قبل مـ أنسى ...
1. طبعاً واضح إن اللي طلبت مني الواجب الجميلة ناعومى ...
2. ذكرت القوانين فوق .. هي حكايه بقى ... !!
3. تحدثت عن الـ 6 أشياء و رغيت كتير أوي ... !!
4. تحويل الواجب بقى .. دي مشكله فعلاً ... !!
لسه مش عارفه مدونات كتير أوي زي أغلب المدونين ...
و كل لما أروح مكان أعرفه الاقي الواجب موجود و محلول ... !!
بس عموماً يعني اللي قدرت أعرف أحولّهم الواجب كما يلي ...
ا. إيهاب رضوان .
ا. تــــامر .
الجميلة مروه يـــس ( كريزمانيا ) .
إسماعيل البلتاجي ( كرموز ) .
و يا خوفي لـ حد يكون حوّلهم الواجب قبل كده ... !! :(
و الواجب اللي هـ يتحوّل تاني بقى لــــ
نورانه القمر .
( للمره التانيه .. ينفع صح )
د. محمد الدسوقي .
( للمره التالته .. عادي جداً )
5. التعليق هـ اسيبه إن شاء الله فـ كل مدونة ...
و الناس تحاول تساعد معايا عشان مش هـ اعرف أوصل لكله ...
شكراً لحسن إستماعكم .. و إستحمالكم ...
و نستودعكم الله الذي لا تضيع ودائعه ...